Фестываль “ГОД АГІНСКАГА ў ЗАЛЕССІ”
Ансамбль салістаў “ВЫТОКІ”
ПРЭС-РЭЛІЗ
У Беларусі і многіх іншых еўрапейскіх краінах 2015 год шырока адзначаецца, як год Міхала Клеафаса Агінскага – дыпламата і патрыёта, грамадскага дзеяча і мемуарыста, мецэната і музыканта. У год 250-гадовага юбілею Агінскага, адзначанага і на ўзроўні ЮНЭСКО, Дзяржаўны Музей музычнай і тэатральнай культуры прадстаўляе новую экспазіцыю ў адрэстаўраванай Сядзібе Агінскага ў Залессі, а беларускі Ансамбль салістаў “Вытокі” праводзіць шэраг музычных мерапрыемстваў у Беларусі, Польшчы, Літве, Італіі.
Асаблівым праектам Ансамбля “Вытокі” у самой Беларусі з’яўляецца цэлагадовы Фестываль у Сядзібе Юбіляра “Год Агінскага ў Залессі”, які збярэ пад дахам старадаўняй княжацкай сядзібы лепшых беларускіх салістаў, а таксама ансамблі і нават аркестры. Мэтай праекту будзе не толькі шырокае святкаванне 250-гадавіны з дня нараджэння М. К. Агінскага, але і папулярызацыя адрэстаўраванай сядзібы ў Залессі, яе замацаванне ў культурнай прасторы сучаснай Беларусі і грамадскай думцы як адметнага музычнага цэнтра з яго непаўторнай камернай рамантычнай атмасферай.
Каардынатар гэтых праграм і мастацкі кіраўнік Фестываля – лаўрэат міжнародных конкурсаў, фагатыст і дырыжор Аляксей Фралоў (кіраўнік Ансамбля “Вытокі”). Навуковым грунтам Фэста з’яўляюцца найперш даследванні музыколага Святлены Немагай – вядучага спецыяліста ў вывучэнні жыцця і творчасці Агінскага і яго эпохі.
Фэст “Год Агінскага” складаецца з Канцэртаў-Лекцый, Канцэртна-мастацкіх Вечарынаў (у тым ліку “Шляхецкі баль”) і музычных экскурсій, якія будуць праводзіцца адзін раз у месяц на працягу красавіка – снежня 2015 года з праграмамі некалькіх творчых калектываў і салістаў непасрэдна ў Сядзібе-Музеі ў Залессі. Канцэрты будуць праводзіць музыказнаўцы-даследчыкі творчасці М.Кл.Агінскага – кандыдат мастацтвазнаўства Святлена Немагай і старшы выкладчык Акадэміі музыкі, лаўрэат міжнародных конкурсаў Аляксей Фралоў – мастацкі кіраўнік Фэста.
Плануюцца выступы: Ансамбля салістаў “Вытокі”, Ансамбля старадаўняй музыкі “Брэвіс”, Дзяржаўнага камернага аркестра Беларусі, Духавога Аркестра Беларускай дзяржаўнай акадэміі музыкі “Capella Academia”. Салісты: лаўрэаты міжнародных конкурсаў Юрый Бліноў і Аляксандр Музыкантаў (фартэпіяна), зоркі беларускай оперы Юрый Гарадзецкі (тэнар) і Ільля Сільчукоў (барытон). Спецыяльным госцем Фэсту будзе прамы нашчадак М.Кл.Агінскага – піяніст Іво Залускі (Вялікабрытанія). У канцэртах цыкла прагучаць творы К.Агінскага, М.Каз.Агінскага, М.Кл.Агінскага, Ф.Кс.Агінскага, Ё.Гайдна, К. Горскага, А.Ельскага, М.Ельскага, А.Залускай, І.Залускага, Ю.Казлоўскага, Т.Касцюшкі, С.Манюшкі, В.А.Моцарта, К.Стаміца, Я.Стаміца, Я.Тарасевіча, Ф.Шапэна, і шырэй – музыка эпохі Рамантызма, на развіццё якога Агінскі зрабіў значны ўплыў. Гістарычна-танцавальны клуб "Эпоха князя Міхала Клеафаса" аздобяць музыку рухамі тагачаснага танцу. Чакаюцца і сенсацыйныя адкрыцці новых імёнаў і прэм’еры твораў згубленай старадаўняй беларускай музычнай спадчыны, нядаўна знойдзенай даследчыкамі ў архівах. Падрабязнасці і кантакты з Аргкамітэтам Фэста па тэл.: (+ 375 29) 328 5678, (+ 375 29) 765 5678.